Dirprwyaeth Cymdeithas Pŵer Gwynt Japan yn Ymweld â Mona Lifting

Gwnaeth dirprwyaeth o gynrychiolwyr Cymdeithas Pŵer Gwynt Japan ymweliad â Mona Lifting fel rhan o daith tridiau o Ogledd Cymru i ddysgu am brosiectau pŵer gwynt newydd ac sydd eisoes yn bodoli yn y rhanbarth.

Sefydlwyd Cymdeithas Pŵer Gwynt Japan yn 2001 ac mae’n cynnwys cynrychiolwyr o brif gwmnïau pŵer gwynt Japan.

Mae nifer o ddatblygiadau pŵer gwynt cyffrous ar y gweill ar hyn o bryd yng Ngogledd Cymru, ac roedd y ddirprwyaeth yn awyddus i ddysgu o’r profiad hwn a ffurfio partneriaethau gyda chwmnïau yn yr ardal. Mae Mona Lifting yn cynnig arbenigedd sylweddol mewn peirianneg a chodi trwm a thrin deunyddiau, ac felly’n ddelfrydol i gefnogi’r sector hwn sy’n tyfu.

Dywedodd Yoshinori Ueda, Rheolwr Cyffredinol Cymdeithas Pŵer Gwynt Japan: “Daethom i Gymru i gael gwell dealltwriaeth o’r diwydiant gwynt morol, gan fod y prosiectau gwynt morol cyntaf wedi digwydd oddi ar arfordir Gogledd Cymru. Cawsom y cyfle i ddysgu a gweld y prosiectau hyn yn ogystal â dysgu am gyfleoedd yn y dyfodol yng Nghymru.”

Dywedodd Vaughan Gething, Gweinidog yr Economi: “Mae cysylltiadau agos rhwng Gogledd Cymru a Japan. Rydym yn gwybod, er enghraifft, am berthynas arbennig o agos gyda thref Conwy gyda’r paru cyntaf ac unig rhwng dau safle Treftadaeth y Byd Unesco – Castell Himeji yn Hyogo a Chastell Conwy, a ymwelwyd â nhw yn ystod eu taith yn ogystal â chlywed am y diwylliant a’r iaith.

“Mae’r ymweliad gan y ddirprwyaeth yn rhoi’r cyfle i gryfhau’r berthynas hon ymhellach a dysgu oddi wrth ein gilydd ym maes cynhyrchu ynni carbon isel. Gobeithiwn y gallwn rannu ein dysgu gyda hwy gan i Gymru gynnal y prosiectau gwynt morol cyntaf yn y DU. Hoffwn ddiolch i bawb a fu’n rhan o’r ymweliad hwn am eu hamser a’u hymdrechion wrth gefnogi’r daith hon ac edrychwn ymlaen at groesawu dirprwyaethau pellach o Japan yn y misoedd i ddod.”