Teclyn Codi Pwrpasol ar gyfer CERN, y Sefydliad Ewropeaidd ar gyfer Ymchwil Niwclear

Llwyddodd Mona gyda’i gais i ddylunio a gweithgynhyrchu teclyn codi pwrpasol 105 tunnell i CERN, y cyfleuster Ewropeaidd ar gyfer Ymchwil Niwclear, yn Geneva, y Swistir.

Mae’r darn cymhleth yma o gyfarpar yn cael ei ddefnyddio i ddelio ag Olwyn Fach Newydd (NSW) yr arbrawf ymchwil ATLAS yn y Peiriant Gwrthdaro Hadronau Mawr, a ddyluniwyd er mwyn chwilio am dystiolaeth o ddamcaniaethau datblygedig ym maes ffiseg gronynnau.

Mae’r teclyn codi gan Mona yn gynnyrch mawr a chymhleth sydd wedi cael ei ddyfeisio yn unol â gofynion llym. Mae’r teclyn ei hun yn rhyngweithio â’r NJD/NSW drwy bin canolog wedi’i weldio, yn gweithredu â goddefiannau geometreg tynn, ac wedi’i osod gan ddefnyddio cyfarpar arbenigol i dracio laser. Yna, bydd bachyn y craen yn cael ei ddefnyddio i godi’r teclyn gyda dau bin bachyn. Mae’r pinnau bachyn, yn eu tro, yn cael eu gosod mewn pâr o blatiau pin sy’n caniatáu addasiad llorweddol o 100mm ar gyfer lleoliad y pinnau os bydd angen, drwy bedwar addasydd pin. Mae llewys pin yn cynnal y pinnau bachyn pan fyddan nhw’n cael eu datgysylltu oddi wrth y teclyn, er mwyn gostwng bachyn y craen i’w osod yn ei le. Mae 20 gwrthbwys, pob un yn pwyso 200kg, yn cael eu gosod ar y trawst llorweddol er mwyn sicrhau bod y llwyth yn cael ei godi’n gytbwys.

Mae stand fertigol wedi’i gynnwys, a ddefnyddir i storio’r teclyn codi yn y safle fertigol. Mae gan y stand fertigol bwyntiau cysylltu addas i godi a diogelu’r teclyn codi wrth ei lwytho a’i gludo yn y safle llorweddol. Mae’r stand fertigol yn cynnwys pwynt cylchdroi er mwyn troi’r teclyn codi o’r safle llorweddol i’r safle fertigol, ac i’r gwrthwyneb.

Roedd Mona yn falch iawn o glywed ein bod wedi ennill y contract hwn ac wrth ein bodd yn cael cydweithio â sefydliad a phrosiect mor uchel ei broffil.